آؤ سنواریں پاکستان

رشتہ۔ ایک چار حرفی لفظ لیکن تمام انسانیت کی تعریف اس میں موجود۔ آخر انسان و حیوان میں فرق ہی کیا ہے؟ کوئی کہتا ہے کہ ٹیکنالوجی تو کوئی کہتا ہے گویائی لیکن میں کہتا ہوں کہ ایک دوسرے کے دکھ درد کو محسوس کردینے کی صفت کو نکال کر انسانیت کا دامن تمامتر فصاحت و ترقی کے باوجود خالی ہوجائے گا۔ رشتہ نام ہے اس احساس کا جو ہمیں ایکدوسرے سے جوڑتا ہے۔ فرد کو معاشرہ، معاشرہ کو قوم اور اقوام کو ایک نسل میں پروتا ہے۔ اگر رشتوں کا احساس و پاس نہ ہو تو انسان ارنے بھینسوں کے اس ہجوم کی ہی مانند ہے جو ایکدوسرے کے نفع و نقصان سے قطع نظر صرف اپنا پیٹ بھرنے میں مشغول ہوتے ہیں۔ میری بلا سے کوئی جئے یا مرے،  مجھے تو بس یہ چاہئے، میرا تو بس یہ مقصد ہے، میں تو ایسے ہی رہوں گا وغیرہ وغیرہ۔ یہ تمام انسانی نہیں حیوانی جبلیات ہیں کہ انسان تو جب بھی سوچے سب کے لئے سوچے گا۔ اپنی خوشی کو، اپنی انا کو، اپنی ضد کو اوروں کی خوشی پر قربان کردینا ہی تو انسانیت ہے کہ دنیا کے ہر اونچے آدرش، ہر آفاقی تعلیم کا بنیادی اصول تو یہی ٹھہرا۔

رشتہ اس بنیادی انسانی وصف کے لئے مہمیز کا کام دیتا ہے۔ رشتہ  وہ زنجیر ہے جو پروتا ہے عبد کو معبود سے، والدین کو اولاد سے، فرد کو امت و ملت سے۔ سوچئے اگر رشتے نہ ہوں تو انسان کی زندگی کتنی بے کیف کتنی پھیکی ہوجائے؟ اللہ نے اپنی مہربانیوں میں سے ایک مہربانی یہ بھی بیان فرمائی کہ والدین کے دل میں اولاد کے لئے محبت ڈالی گویا رشتے کی پہچان ڈالی۔ انسانی جذبات کے جتنے بھی سوتے ہیں وہ ان رشتوں سے ہی تو پھوٹتے ہیں۔ ہماری تمام تشبیہات، تمام استعارے اپنی لطافت و معنویت کے لئے ان رشتوں کے ہی تو محتاج ہیں۔ لیکن افسوس کہ اب ہم ان رشتوں سے ان پہچانوں سے دور ہوتے جارہے ہیں۔ وہ رشتے جو کبھی بے لوث و بے غرض محبت کے استعارے ہوا کرتے تھے،جو ضرب الامثال کا موضوع ہوا کرتے تھے، انہوں نے اب انا پرستی و خودغرضی کے مکروہ لبادے اوڑھ لئے ہیں۔ جن سے توقع کی جاتی تھی کہ وہ اپنا سب کچھ لُٹا دیں گے آپ کی خوشی کے لئے، وہ رشتے اپنی ناآسودہ خواہشات کی تکمیل کے لئے آپ کی خواہشات کو ذبح کرتے نظر آتے ہیں۔ جن سے توقع تھی کہ گرنے پر تھام لیں گے، وہ آپ کو اپنی انا کے بلڈوزروں تلے  کُچلنے کے لئے تیار نظر آتے ہیں۔

ایک وقت تھا ہمارا معاشرہ فخر کرتا تھا اپنے اس وصف پر کہ ہم رشتے بنا اور نبھا جانتے ہیں۔ کہ ہم میں پاسِ وفا ہے۔ کہ ہم سطحی آسودگی سے اوپر اُٹھ کر انسان کو اس کی اصل کی وجہ سے، اس کے وصٖف کی بنا پر چاہتے اور پہچانتے ہیں۔لیکن پھر یہ ہوا کہ ہم سے یہ سب کھو گیا۔ ہم جو دعوے کرتے تھے اقدارکی عظمت و پاسداری کے اپنی اقدار کو آگ لگانے لگ پڑے۔ اخوت کے سبق پڑھتے پڑھاتے رشتوں کو روپے پیسوں میں تولنے لگ پڑے۔ ہمارے قریبی وہ نہ ٹھہرے جو ہم سے متعلق تھے بلکہ وہ بنے جو ہم سے زیادہ یا ہم جتنے مالدار تھے۔ اولاد کی خوشی ہمارا مطمع نظر نہ ٹھہرا بلکہ اولاد کا مقصد یہ ہوا کہ وہ ہمیں ہماری خواہشات کے پورا کرنے میں مدد دے۔ بہن بھائی اگر غریب ہے تو اس کی مدد تو کی جاسکتی ہے لیکن اس سے بڑھ کر نہ تو رشتہ مانا جاسکتا ہے اور نہ جوڑا۔ ہمارا رشتہ وہیں سےٹھہرا جہاں ہمیں زیادہ ہری گھاس چرنے کو ملے۔ نفسا نفسی کی اس دوڑ میں جو ہمارے راستے میں آیا رزق خاک ہوا۔ اولاد اگر ہماری توقعات کے مطابق منافع نہیں دے سکتی تو بھلے مر جائے۔ بہن بھائی کو اپنانے سے اگر سٹیٹس میں کمی آتی ہے تو بھاڑ میں جائیں۔ اپنے ماضی سے شرمندہ مستقبل کے غیر حقیقی و غیر منصف خیالی پلاؤ بُنتے جب ہمیں اس حقیقت کا احساس ہوتا ہے جو ہماری خواہشات کے برعکس ہوتی ہے تو اس حقیقت کو بدلنے کے لئے ہم ہر حربہ استعمال کرنے پر تُل جاتے ہیں خواہے کتنے ہی آدرش، کتنے ہی اصول، کتنی ہی خواہشات اس کی بھینٹ چڑھ جائیں، کتنی ہی خوشیاں پامال ہوجائیں ہمیں اس سے غرض نہیں کہ ہمیں توصرف اپنی خوشی، اپنی انا کی آسودگی چاہئے۔

بوالہواسی کے اس ننگے ناچ میں کبھی تو ہم بظاہر فاتح ہوجاتے ہیں اور کبھی متاع عمر مع سود لُٹا کر حیراں و سرگرداں پھرتے ہیں۔ نتیجہ دونوں صورتوں میں بہرحال ناآسودگی و بربادی ہی ہوتا ہے۔ افسوس تو اس بات کا ہے کہ یہ تماشا روز و شب ہمارے سامنے ہوتا ہے لیکن ہم دیکھتے ہی نہیں۔ کسی دوسرے پر بیت جانے والی بات کو سمجھتے ہیں کہ ہم اس انجام سے محفوظ رہیں گے۔ بھلا اگر دو راہی ایک ہی راہ کے مسافر ہوں تو منزل مختلف کیسے پائیں گے؟ ہمیں اس حقیقت کا ادراک کرنا ہوگا کہ اگر ہمیں ایک خوشحال اور آسودہ مستقبل چاہئے تو ہمیں اس راہ کو، اس روش کو ترک کرنا ہوگا جس پر ہم چل رہے ہیں۔ ہمیں اس بات کا یقین کرنا ہوگا کہ اوروں کی خوشیوں کا گلا گھونٹ کر ہم اپنےدامن  میں خوشیاں نہیں بھرسکتے۔  اگر ہم چاہتے ہیں کہ ہمارے اردگرد ہمیشہ خوشیاں رہیں، ہمیشہ سکون رہے، پیار رہے، محبتیں رہیں تو ہمیں یہ پیار، یہ محبتیں، یہ خوشیاں یہ سکون بانٹنا ہوگا اپنے اردگرد رہنے والے افراد کے ساتھ، اپنے سے وابستہ افراد کے ساتھ۔ ہمیں اپنے رشتوں کو پہچاننا ہوگا، اور ان کے حق کو ماننا ہوگا۔ ہمسائے کا حق، اولاد کا حق، والدین کا حق، بہن بھائی کا حق،  مملکت کا حق، خالق کا حق، مخلوق کا حق علٰی ہٰذا القیاس۔ ان تمام رشتوں کو مانے بغیر، انہیں ان کا حق دئیے بغیر نہ ہم سکون پاسکتے ہیں اور نہ خوشی۔