آؤ سنواریں پاکستان

ایک حادثہ کے نتیجہ میں جب ہماری تعلیم کا باقاعدہ آغاز ہوا تو ہمارا پہلا مکتب ایک پرائیویٹ سکول ٹھہرا جس کا نام مدرستہ البنات تھا۔ اگرچہ نام سے تو یہ خالصتاً نسوانی ادارہ ہونا چاہئے تھا لیکن اس دور میں (1979) یہاں مخلوط تعلیم تھی اور پنجم جماعت تک تعلیم دی جاتی تھی۔ زمرہ اساتذہ میں البتہ تمام تر خواتین ہی تھیں اور ماسوا ایک پی ٹی ماسٹر کے بقیہ معاملات کلیتاً خواتین کے سپرد تھے۔ اس سکول کا ماحول حسب توقع انتہائی مہذب تھا۔ اگرچہ چند استانیاں درشت مزاج تھیں لیکن بحیثیت مجموعی ایک انتہائی معتدل اور علم پرور ماحول تھا۔ تربیت پر توجہ اس لئے دی جاتی تھی کہ خواتین کی موجودی میں دشنام طرازی اور دیگر مکروہات کا گزر ممنوع تھا سو درجہ چہارم تک ہم نے جو کچھ کتابوں میں پڑھا، کافی حد تک اس پر عمل ہوتے بھی دیکھا اور ہمارے مزاج کا کھلنڈرا پن اس دور میں اپنے عروج پر رہا۔

پھر ہمارے والدین نے طویل غور وخوض کے بعد ہمیں گورنمنٹ ماڈل ہائی سکول صادق آباد میں داخل کروا دیا۔ وجہ اس کی یہ کہ اس دور میں اس سکول کا نتیجہ تمام ڈویژن میں بہترین آیا کرتا تھا اور بورڈ کے امتحانات میں پہلی تین میں سے کوئی ایک کا حامل ہونا اس مکتب کے لئے معمول کی بات تھی۔ ان سب باتوں سے قطع نظر اس سکول کا ماحول انتہائی درجہ تک عوامی تھا۔ سو جب ہم کرسی ڈیسک کے ماحول سے یکدم ٹاٹ پر اُتارے گئے تو ایک دھچکا لگا۔ ون ٹو کرتے جب ایک دو کے پہاڑے سُنانے کا تقاضا ہوا تو ہم صرف ہونقوں کی طرح مُنہ دیکھاکئے۔ والدین نے چار برس کی عمر میں سکول بھیجا تھا تو اس نئے سکول میں ہم اپنی جماعت کے سب سے کم عمر فرد ٹھہرے۔نہ ہمیں ساتھیوں کی بات سمجھ آتی نہ استادوں کہ ذریعہ تعلیم پنجابی تھا اور ہم اس وقت تک صرف اُردو بول سکتے تھے یا انگریزی اور کچھ کچھ عربی۔ جہاں گزشتہ سکول میں زیادہ سے زیادہ سزا ایک چپت یا مسطر سے چند معصوم سے ضربیں ہوا کرتی تھیں، نئے سکول میں مولا بخش ایک لازم ہتھیار تھا اور اساتذہ اس کا استعمال کافی فراخدلی سے کیا کرتے تھے۔قصہ مختصر یہ کہ جب ہم ایک خالصتاً نسوانہ ماحول سے یکدم ایک خالص مردانہ ماحول میں پہنچے تو  یوں لگا کہ ایک بپھرے ہوئے سمندر میں پھینک دئے گئے ہیں۔ قصور اس میں سکول کا نہ تھا بلکہ ان دو متوازی نظاموں کا تھا جن کا ہم شکار بنے۔ جہاں پہلے مکتب میں لوگ سچ بولتے، نستعلیق طریقے سے زندگی گزارتے تھے، نئے سکول میں دشنام طرازی، ذومعنی فقرہ بازی، جنگ و جدل، لڑائی مار کُٹائی عام تھی۔

اس خالصتاً عوامی ماحول میں ہمیں جائے امان یہی نظر آئی کہ اپنے خول میں دُبک جائیں۔ آہستہ آہستہ ہم جماعتوں پر اس کا انکشاف ہوا تو ہمیں کچھ ستانا شروع کیا۔ ایک ایسی ہی واردات کے بعد ہمارا ٹھنڈا ٹھار راجپوتی خون گرمی کھا کر اُبلا تو اپنے سے دوگنے ڈیل ڈول والے ہم جماعت سے بھڑ پڑے۔ نتیجتاً خوب پھینٹی پڑی۔ ابھی ہماری درگت بن رہی تھی کہ ایک اور ہم جماعت کو جوش آیا اور وہ ہماری حمایت میں میدان میں آموجود ہوا۔ ہم دونوں اس معرکہ میں فاتح نہیں تو برابر تو چھوٹے لیکن اس روز جس دوستی کی بنیاد پڑی وہ آج چھبیس برس کے بعد بھی الحمدللہ قائم ہے۔ میرے اس دوست کا نام ہے محمد نائب جو اس جہان فانی میں میرا پہلا یار بنا۔ بہتیرے گرم و سرد دیکھے ہم نے اکٹھے لیکن الحمدللہ آج بھی یہ دوستی قائم ہے اگرچہ اس دوستی کے قیام اور بقا کا سارا سہرا نائب کے اس بے لوث جذبہ اور وفا کو جاتا ہے جس کا پہلا اظہار اس نے آج سے چھبیس برس قبل کیا تھا۔ نائب کی صورت میں ایک دوست ملا تو ہم نے بھی نئے سکول میں کچھ دلچسپی لینا شروع کی۔ یہ ساتھ پنجم تک رہا۔

پنجم کے بعد دوسرے سکولوں سے طلباء ہمارے سکول میں داخل کئے گئے تو ایک جماعت کو کئی سیکشنوں میں بانٹ دیا گیا۔ ظلم یہ ہوا کہ نائب کو ہم سے الگ سیکشن میں بھیج دیا گیا۔نئے لڑکے تو گویا ایک نئی ہی مخلوق تھے۔ اتنا تنوع آیا ہمارے ماحول میں کہ بس الاماں۔ ہر روز نئے انکشافات۔ جسے دوست سمجھیں وہی اُلو بنا کر چلتا بنے۔ ہم سمجھتے تھے کہ جسے اچھی اقدار کا سبق اچھی طرح یاد ہے وہ ان اقدار پر عمل بھی سب سے زیادہ کرے گا۔ اس وقت تک یہ ادراک ہی نہ تھا کہ سبق یاد کرنا اور بات ہے اور اس پر عمل اور۔ سو خوب جی بھر کے ٹھوکریں کھائیں۔ بدقسمتی یہ رہی کہ ایک مثالی دُنیا کی تلاش ہم نے چھوڑ نہ دی بلکہ عمر عزیز کے اگلے پانچ برس کا عرصہ ہم نے اسی تلاش میں گُزار دیا۔ اللہ کا شُکر ہے کہ پڑھائی میں اچھے تھے تو گزارا چلتا رہا لیکن کتابوں سے جی اُچاٹ تھا۔ اساتذہ اور والدین کتابوں پر زور دیتے تھے اور ہم مشاہدہ کے شیدا تھے۔ سو اول الذکر افسوس کرتے رہے اور ہم اپنی دُنیا میں گُم حیراں و سرگرداں  بھٹکتے، ٹھوکریں کھاتے زندگی کے دن گُزارتے رہے۔ اس پر طُرہ یہ کہ ہمارے خالہ زاد پڑھائی میں ماشاء اللہ بہت اچھے تھے اور اپنی جماعت میں اول آیا کرتے تھے۔ سو ہمارے والدین کی دلی آرزو تھی کہ ہم “اُن” جیسے بن جائیں۔ ہم خود کیا ہیں اور کس تلاش میں سرگرداں ہیں اس پر کسی کو دھیان دینے کی نہ فرصت تھی نہ توجہ۔ سو ایک خلیج پیدا ہوتی چلی گئی۔ اسی سب کچھ کے دوران ہم نے میٹرک پاس کرلیا۔ نتیجہ آیا تو سب کی امیدوں کے برعکس ہم گورنمنٹ کالج لاہور میں داخلہ کے اہل نہ ٹھہرے سو باامر مجبوری ہمیں ایف سی کالج داخل کروا دیا گیا۔