آؤ سنواریں پاکستان

ہمارے بچپن کے بارے میں جب بھی بات ہو تو ہمارا جواب ہمیشہ یہی ہوتا ہے “اللہ کا شکر ہے کہ بیت گیا اور اب دوبارہ کبھی نہیں آئے گا”۔ آج آپ نے بچپن کی یادوں کو کھنگالنے کی فرمائش کی تو چند ایک نسبتاً بے ضرر سے واقعات جو یاد آتے ہیں آپ کی بصارتوں کی نذر کئے دیتےہیں۔

1۔  سب سے پہلے تو آپ کو بتائیں اپنے پر کئے جانے والے ایک ظلم کی داستان۔ ہمارے پھوپھا کے پاس ان دنوں کار ہوا کرتی تھی اور سن ہمارا چار برس کا تھا۔ ایک روز وہ ہمارے یہاں آئے۔ جب وہ چلے گئے تو مجھ معصوم نے اپنے والدین سے پوچھا “انکل نے کار کیسے لی؟” اللہ ہمارے والدین پر اپنی رحمتیں نازل کرے، دونوں نے جھوٹ بولنے کا نیا ریکارڈ رقم کرتے ہوئے کہا “انہوں نے پڑھا اور انہیں کار مل گئی” (انکل موصوف ٹھیکیدار تھے اور ان کی کار کا پڑھائی سے کوئی تعلق نہیں تھا)۔ معصوم بچے نے جوش میں کہا “تو پھر میں بھی پڑھوں گا”۔ خلد آشیانی والد صاحب نے اس پر ہماری والدہ کو کہا “اسے صبح سکول داخل کروادیں”۔ اور بس 1980 میں جو کار حاصل کرنے کی تگ و دو شروع ہوئی تو پھروہ کار مئی 2005 میں ملی۔ ہم اس واقعہ کو بچوں کے استحصال کی مثال کے طور پر یاد کرتے ہیں۔

2۔ ہمارا اولین سکول جہاں ہم نے درجہ چہارم تک اکتساب علم کیا گھر سے کوئی دو تین سو میٹر کی دوری پر تھا۔ راستے میں ایک  سڑک اور ایک بسوں کا اڈا پڑتا تھا جنہیں پار کرنے کے بعد ہم اپنے محلہ میں پہنچ جاتے تھے۔ ہم اور ہمارے ہمسائیوں کی بیٹی ہم جماعت تھے اور عموماً اکٹھے سکول سے واپس آیا کرتے تھے۔ ان میں بدقسمتی سے اس وقت لڑکیوں والی تمام عادات موجود تھیں اور ہم بھی ان دنوں کافی مہم جو ہوا کرتے تھے۔ ایک دفعہ غالباً دوسری جماعت کا واقعہ ہے ہم سکول سے واپس آرہے تھے۔ سڑک پار کرنے لگے تو  ایک گاڑی قریب آرہی تھی۔ ہم نے رعب ڈالنے کے لئے اپنی ہم جولی کو جن کا نام ارم تھا کہا “دیکھنا ابھی اس گاڑی سے پہلے سڑک پار کر جاتا ہوں”۔ اور پھر دوڑ لگا دی۔ گاڑی والے پر جو بیتی سو بیتی لیکن ان انکل کی خونخوار آنکھیں آج بھی یاد ہیں جن سے انہوں نے بمشکل تمام ہمیں “ناگہانی وفات” سے بچانے کے بعد ہمیں دیکھا تھا۔ نتیجہ ۔۔۔ اس کے بعد ہمیشہ سڑک دھیان سے ادھر اُدھر دیکھ کر پار کی ۔ تھینک یو انکل۔

3۔ غالباً تیسری جماعت کا واقعہ ہے۔ ابا کا سکوٹر گھر کھڑا تھا اور اس کے ساتھ ہی بلب کا سوئچ تھا جو ہمارے کھیل کے دوران گیند لگنے سے تھوڑا اندر کو پچک گیاتھا۔ اماں ہمسائیوں کے یہاں گئی ہوئی تھیں۔ ٹھکائی سے بچنے کے لئے سوچا کہ چلو اسے اڑیس لگا کر باہر نکال دیتے ہیں۔ اوزار اور کوئی ہاتھ نہیں آیا تو اباجان کی مونچھیں تراشنے والی قینچی پکڑ لی۔ سکوٹر پر چڑھے اور قینچی بٹن کے اندر گُھسا کر بٹن کو باہر نکالنے لگے۔ بس اتنا یاد ہے کہ زور سے ایک جھٹکا لگا تھا اور ہم سکوٹر سے نیچے آن پڑے۔ شائد سکوٹر کے ربڑ کے ٹائروں کی وجہ سے اس روز ہم مرحوم ہونے سے بچ گئے تھے کہ ہم ہی پہلوٹھی کی اولاد ہیں اور گھر میں اور کوئی بڑا موجود نہیں تھا۔

4۔ یہ بھی تیسری جماعت کا ہی واقعہ ہے۔ ان دنوں ہمیں اپنی رفتار کا بڑا زعم تھا۔ سکول سے واپسی پر ہم نے ایک “مرونڈوں” کی ریڑھی دیکھی جو ایک باباجی کی تھی۔ ہم نے اپنی تیز رفتاری ثابت کرنے کے لئے ارم کو کہا “ابھی دیکھنا میں ان باباجی کا مرونڈا اٹھا کر بھاگ جاؤں گا اور یہ مجھے نہیں پکڑ سکیں گے”۔ارم نے ایک میسنی کی خاموشی اختیار کئے رکھی۔ ہم باباجی کی ریڑھی کے پاس پہنچے، جھپٹ کر ایک مرونڈا اٹھایا اور اُڑن چھُو ہو لئے۔ باباجی تو ہمیں نہ پکڑ سکے لیکن ارم نے پورے التزام کے ساتھ یہ قصہ ہماری والدہ کو آسُنایا۔ اور پھر اس کے بعد چراغوں میں روشنی نہ رہی۔

5۔ تیسری یا چوتھی جماعت کا واقعہ ہے۔ ہمیں گنتی اور کرنسی سے تو واقفیت اچھی خاصی تھی لیکن چار آنے، آٹھ آنے وغیرہ سے نابلد تھے۔ ہمارے ذمہ ایک جوتے کو مرمت کروانا ٹھہرا۔ موچی کے پاس گئے، اس نے جوتا مرمت کیا۔ ہم نے پوچھا کے روپے؟ انہوں نے کہا آٹھ آنے۔ اب ہمارے پاس ایک روپیہ تھا سو گھبرا گئے کہ یا اللہ میرے پاس صرف ایک روپیہ ہے اور یہ “آٹھ” آنے مانگ رہا ہے۔ لجاجت سے عرض کی”ایک روپیہ لے لو گے اس کا؟” موچی صاحب نے تاڑ لیا کہ “چوچا” ناواقف ہے۔ بے نیازی سے کہنے لگے “جیسے تمہاری مرضی”۔ ہم نے ایک روپیہ انہیں پکڑایا اور احساس شکرگزاری سے لبریز گھر پہنچے۔ گھروالوں نے پوچھا “جوتا مرمت کروا آئے”۔ جواب دیا “جی ہاں”۔ پوچھا “کتنے دام میں؟” ہم نے فخریہ سارا واقعہ بتا دیا۔ بس پھر اس دن کے بعد سے آٹھ آنے کا حساب بھی ازبر ہو گیا۔