آؤ سنواریں پاکستان

کچھ عرصہ بعد سوچا کہ آج پھر بات کی جائے اپنے محبوب سندھو کی، اس کے حیات بخش پانیوں کی، اس کی لہروں میں کھیلتی کودتی زندگی کی۔ اس زندگی کی جسے بے رحمی سے موت کی گھاٹ اُتارا جارہا ہے۔ کچھ بات کی جائے ان کی جنہیں نہ وسائل میسر ہیں نہ قیادت کہ جو ان کے حق پر پڑنے والے ڈاکے پر آواز اُٹھائے کہ کسی میں "ہل من مزید" کا الاپ جپتے وحشیوں کو روکنے کی سکت نہیں۔   اباسین ۔۔۔ جسے شیر دریا کہا جاتا ہے تو کبھی سندھ، کبھی سندھو تو کبھی انڈس۔ جس کے پانی اوائل تاریخ سے اس دھرتی کو سیراب کرتے آرہے ہیں۔ ان پانیوں پر آخر حق کس کا ہے؟ یہ مسئلہ بھی کبھی اٹھانا چاہئے کہ ہم میں سے اکثر یا تو جہالت کا شکار ہیں یا تعصب کا اور ان دونوں انتہاؤں کے درمیان نفرتوں کی فصلیں سینچی جارہی ہیں۔ آخر ایسا کیوں نہ ہو کہ تعصب اور نفرت کی یہ دیواریں گرادی جائیں کہ جن کی تعمیر و افزودگی میں ہی ان کا بھلا ہے جن کی ہم رعایا ہیں؟ تو چلیں آج بات کریں سندھ کی اور اس کے پانیوں کی۔ بات کریں ان پانیوں میں چھلکیں مارتی لہروں کی اور ان لہروں میں اچھلتی کودتی گاتی ڈالفن کی۔ ان مگرمچھوں کی جو ان پانیوں میں پلتے ہیں۔ مانگروو کے ان جنگلوں کی جو ان پانیوں کے باسی ہیں کہ یہ سب ہماری آنکھوں کے سامنے، ہمارے ہی ہاتھوں زندگی کی جنگ ہار رہے ہیں۔

اوسط سے کمتر ذہانت کے حامل ہمارے حکمران عرصے سے ہمیں لوریاں سُناتے آرہے ہیں کہ ہم دریا کا اتنے ملین کیوبک فٹ پانی سمندر میں ضائع کردیتے ہیں۔ اور یہ کہ ان پانیوں سے ہم کتنے ریگزاروں کو گلزاروں میں بدل سکتے ہیں وغیرہ وغیرہ۔ یہ بات کبھی کسی نے مُنہ سے نہ پھوٹی کہ اس سب کی قیمت چھ لاکھ  ہیکٹر رقبے پر پھیلے ہوئے مانگروو کے وہ جنگل چکائیں گے جنہیں سمندر کا پانی نگل لے گا۔ دس مختلف اقسام کے ممالیہ جانور، ایک سو تینتالیس اقسام کے پرند، بائیس اقسام کے رینگنے والے جاندار (جن میں مگر مچھ بھی شامل ہیں)، دوسو سے زیادہ قسم کی مچھلیاں اور پندرہ قسم کے جھینگے ان جانداروں میں شامل ہیں جنہیں ناپید ہونا ہوگا۔  یہ کہ صحرا کو گلزار کرنے کی دُھن میں وہ لہلہاتے  کھیت ویران ہو جائیں گے جو کسی وڈیرے، کسی رکن پارلیمنٹ اور کسی جرنیل کی ملکیت نہیں۔ یہ کہ اس کے بعد سندھ کا ڈیلٹا ایک کھاری دلدل میں بدل جائے گا جس میں کوئی مرغابی اترنا پسند نہیں کرے گی، جہاں پلا مچھلی کے ذائقے پروان نہیں چڑھیں گے۔ یہ کہ اس سب کے بعد مانگروو جنگل کی جگہ ایک کھاری قبرستان ہوگا جس میں مانگروو دفن ہوں گے۔ اورسب سے بڑھ کر یہ کہ نئے جہان آباد کرنے کی یہ ہوس ان کے گھروں کو اجاڑ دے گی جو قرنوں سے سندھ کنارے  آباد ہیں۔

آج حالت یہ ہے کہ سندھ کا ڈیلٹا اپنے اصل رقبہ کا صرف دس فیصد رہ گیا ہے۔ مانگروو کے جنگل ہر روز اپنے باسیوں کے ساتھ اپنی بقا کی جنگ ہارتے جارہے ہیں کہ سمندر ہر روز اسی ایکڑ زمین پر قبضہ کرتا جارہا ہے۔ سندھ  کے پانی  چولستان و تھر کے ریگزاروں کو گلزار بناسکیں یا نہ، انہیں چھین کر ہم سندھ کے ہرے بھرے ڈیلٹا کو اُجاڑ رہے ہیں۔ سندھ کی اندھی ڈالفن بھی ہماری اس اندھی ہوس کے بھینٹ چڑھ جائے گی کہ جب اس کے تیرنے کو تازہ پانی ہی نہ رہا تو کہاں کی ڈالفن اور کہاں کے نغمے؟ سوال ذہن میں اٹھتا  ہے کہ اگر کسی کا گھر اُجاڑ کر کسی کا پہلے سے بھرا گھر مزید بھرے تو کیا اس کا کوئی قانونی و اخلاقی جواز ہے؟ جب دنیا کے مروجہ قانون کے مطابق دریا کے پانیوں پر سب سے زیادہ حق اس کے ڈیلٹا اور ٹیل پر بسنے والوں کا ہے تو پھر ہم انہیں ان کے حق سے محروم کیوں کر رہے ہیں؟  آخر کیوں وہ پانی انہیں نہیں دیا جاتا جو ان کا حق ہے؟ اگر پانی کم ہے تو کٹوتی یکساں کیوں نہیں کی جاتی؟ آخر کیوں ہم اپنوں کے ساتھ ہی انصاف نہیں کرسکتے؟ معاشیات کی بات کریں تو حقیقت یہ ہے کہ سندھ کا ڈیلٹا سال میں 120 ملین ڈالر کی پیداوار دے سکتا ہے۔  اس کے لئےاگر تربیلا میں ذخیرہ کردہ پانی کا 25 فی صد بھی چھوڑ دیا جائے تو خزانے کو 38 ملین ڈالر سالانہ کو نقصان ہوتا ہے۔ واضح طور پر ایسی صورتحال میں بھی ڈیلٹا ایک زیادہ منافع بخش سودا ہے۔ ماحول پر اس ڈیلٹا کے پڑنے والے مثبت اثرات اس سب کے علاوہ ہیں۔

اس وقت حال یہ ہے کہ دنیا کا سب سے بڑا آبپاشی نظام رکھنے کا زعم تو ہمیں ہے لیکن کیا ہم نے اس نظام کو اس کی مکمل اہلیت کے مطابق استعمال کرلیا ہے؟ پانی کا ضیاع جو کچے کھالوں اور دیگر وجوہات کی بنا پر ہوتا ہے کیا اس کا سدباب کرلیا  ہے جو ہمیں اب مزید پانیوں کی ضرورت ہے؟ اور سب سے بڑی بات یہ کہ اپنوں کو پیاسا مارنے سے پہلے کیا ہم نے ان کا علاج کرنے کا سوچا ہے جو ہمارے پانیوں پر بے درنگ قبضہ کئے جارہے ہیں؟ جب ان تمام سوالوں کا جواب "نہیں" میں ہے تو پھر کیا جواز ہے اپنی ہوس کے لئے اوروں کا گلا گھونٹنے کا؟ آج جب دنیا قدرتی حیات اور ماحول کو بچانے کی باتیں کررہی ہے، ہم اپنے ماحول کی بربادی کا مزید سامان کرنا چاہ رہے ہیں۔ ہم کیوں نہیں مان سکتے کہ یہ دنیا خالق کی تمام مخلوقات کے لئے ہے؟ یہ کہ تخلیق کا یہ خوبصورت نظام ایک انتہائی نازک توازن پر قائم ہے اور اس توازن میں گڑبڑ کی قیمت آپ کو جلد یا بدیر چُکانا پڑتی ہے۔یہ کہ ڈیلٹا میں بہنے والا پانی بھی اتنا ہی حیات بخش اور ضروری ہے جتنا رحیم یارخان کے ایک دیہہ کے کھالوں میں بہتا پانی۔ یہ مرغابیاں، یہ مگرمچھ، یہ ڈالفن، یہ مانگروو کے جنگل اوران میں بستے چرند پرند یہ سب ہمارے اپنے ہیں۔ ہمارا اثاثہ ہیں۔ ہمیں ان کو بچانا ہے کہ اللہ کی رحمتیں انسانوں پر ان کی اپنی کرتوتوں کی وجہ سے کم اور ان بے زبانوں کی وجہ سے زیادہ نازل ہوتی ہیں ۔ اور یہ کہ یہ پانی جو ڈیلٹا میں بہتا ہے وہ ضائع نہیں ہوتا بلکہ دنیاوی منڈی میں اس سے کہیں زیادہ نفع بخش ہے جتنا ہم ان پانیوں کو روک کر کما سکتے ہیں۔

زندگی کے کئی برس میں بھی اس جھوٹ کا شکار رہا کہ کالاباغ بہت ضروری ہے۔ کہ پانی ضائع ہوتا ہے سمندر میں اور اسے استعمال کرنا چاہئے اپنے فائدہ کے لئے۔ لیکن اب معلوم ہوا کہ کتنی بھیانک قیمت ہے اس سب کی۔ اور یہ سب کچھ صرف اس لئے کہ جنوبی پنجاب کے روائیتی جاگیردار کچھ مزید کھیتی زیر آب لاسکیں اور جرنیلوں کو جو زمینیں چولستان میں الاٹ ہوئی ہیں وہ منافع بخش ہوسکیں؟ تف ایسی سوچ پر اور ایسی تنگ نظری پر۔  ایک ہنستے بستے گلشن کو برباد کرکے ایک اور گلستان آباد کرنے کا خواب دیکھنے والے یہ بوالہواس اپنے چند ٹکوں کے لئے اس ملک کو اس کے ورثہ سے محروم کردینا چاہتے ہیں۔ انہیں اس کی بھی پرواہ نہیں کہ ان کے ان اقدامات سے ملک کے عوام کے درمیان ایک ایسی خلیج پیدا ہوجائے گی جسے پاٹنا ناممکن نہیں تو جوئے شیر لانے کے مترادف ہوگا۔ میرا تعلق شمالی پنجاب سے ہے اور میری زندگی کا غالب حصہ صادق آباد ضلع رحیم یارخان میں گزرا ہے لیکن میں یہ کہنا چاہوں گا کہ میں سندھ کے ڈیلٹا کا مقدمہ لڑنے والوں کے ساتھ ہوں۔ سندھ کے پانیوں پر پہلا حق اس کے ڈیلٹا میں بسنے والوں کا ہے اور ان کا گھر برباد کرکے کسی اور گھر کی آبادی مجھے منظور نہیں۔ یہ ہنستی گاتی لہراتی اچھلتی ڈالفن میری ہے، دریا کنارے لیٹے سوتے مگر مچھ میرے ہیں، یہ سندھ کے پانیوں میں پلتی پلا مچھلی میری ہے، یہ مانگروو کے جنگلوں میں پلتے جھینگے میری ہیں۔ یہ دولت ہیں میرے وطن کی اور میں ہر اس فرد، ہر اس طبقہ کے خلاف ہوں جو میرے وطن کو اس دولت سے محروم کرنا چاہتا ہے۔

آج صورتحال اس نہج پر آن پہنچی ہے کہ ہمیں رائے عامہ کو بیدار کرنا ہے اس سے پہلے کہ بہت دیر ہوجائے۔ ہم بہت سا وقت پہلے ہی جھوٹے دلاسوں اور لوریوں کی نذر کر چکے ہیں۔ اگر ہمیں پاکستانی معاشرہ کو ایک امن پرور اور خوشحال معاشرہ بنانا ہے تو ہمیں انصاف کرنا ہوگا۔ کسی بھی وابستگی سے بالاتر ہوکر صرف انصاف کرنا ہوگا۔ تو کیوں نہ اس کا آغاز ان سے کریں کہ جو اپنے پر توڑے والے ظلم کی فریاد بھی نہیں کرسکتے؟ کیوں نہ لوریوں کی بجائے حقائق کھوجیں؟ کیوں نہ حق کا ساتھ دیں خواہ اس کے مخالف کوئی بھی ہو؟ سو آئیں آواز اٹھائیں اس ظلم کے خلاف اور برأت کا اظہار کریں اس ظلم سے جو ہمارے نام سے ہمارے پیاروں پر کیا جارہا ہے۔ آئیں سنواریں پاکستان۔